როსტოვის ოლქში, პროლეტარსკში, ბოლოს და ბოლოს ჩააქრეს ხანძარი ნავთობის საცავში, რომელზეც 18 აგვისტოს განხორციელდა უპილოტო საფრენი აპარატებით იერიში. ამის შესახებ ტასი იტყობინება ოპერატიულ სამსახურებზე დაყრდნობით. ოპერატიული სამსახურის თანამშრომლის თქმით, ღია წვა ლიკვიდირებულია, მაგრამ ძლიერი ქარის გამო მეხანძრეები ყოველი შემთხვევისთვის მაინც მუშაობენ ადგილზე. მანამდე გავრცელდა ინფორმაცია, რომ ნავთობის ბაზაზე ხანძრის ფართობმა ათი ათას კვადრატულ მეტრს მიაღწია. გამოაცხადეს, რომ არ იყო აფეთქების საფრთხე და არ შეინიშნებოდა მავნე ნივთიერებების გამოყოფის გადაჭარბებული დონე. მოსახლეობის ევაკუაცია საჭირო არ გახდა. დრონის თავდასხმის შედეგად (ხელისუფლება ამტკიცებს, რომ მისი ნამსხვრევების ჩამოვარდნის გამო), დიზელის საწვავის ოცამდე ავზს ცეცხლი გაუჩნდა. რაიონში საგანგებო მდგომარეობა გამოცხადდა. ხანძრის ჩაქრობაში მონაწილეობდნენ საგანგებო სიტუაციების სამინისტროს ავიაცია, სპეციალური მატარებლები და ხუთასზე მეტი მეხანძრე-მაშველი, რომელთაგან 49 დაშავდა ხანძრის ჩაქრობისას. ხუთი დღის შემდეგ, 23 აგვისტოს, პროლეტარსკში ცეცხლმოკიდებულ ნავთობის საცავს კვლავ დაესხნენ თავს დრონები. ვარაუდობდნენ, რომ ახალი თავდასხმის სამიზნე იყო ნავთის ავზები, რომლებამდეც იმ დროს არ მიეღწია ცეცხლს. ასევე ნახეთ მოსკოვს სულ უფრო ძვირი უჯდება ახალი „საზარბაზნე ხორცი“ რუსეთის ხელისუფლებამ პროლეტარსკში ნავთობის საცავზე თავდასხმაში უკრაინა დაადანაშაულა. კიევმა დაადასტურა ეს: უკრაინის შეიარაღებული ძალების გენერალურმა შტაბმა განაცხადა, რომ თავდასხმა ორგანიზებული იყო უკრაინის თავდაცვის სამინისტროს მთავარი სადაზვერვო სამმართველოს მიერ უკრაინის შეიარაღებულ ძალებთან თანამშრომლობით. ოპერაციის მიზანი იყო რუსეთის სამხედრო-ეკონომიკური პოტენციალისთვის ძირის გამოთხრა. რუსეთის მიერ უკრაინაში სრულმასშტაბიანი შეჭრის დაწყების შემდეგ, რუსეთის რეგიონები რეგულარულად იბომბება და მათზე დრონების თავდასხმები ხორციელდება. რუსეთის თავდაცვის სამინისტრო იუწყება უკრაინის თავდასხმების „აღკვეთის“ შესახებ და იტყობინება რუსეთის ტერიტორიაზე ჩამოგდებულ რაკეტებსა და უპილოტო საფრენ აპარატებზე. არის ნგრევა და მსხვერპლი. უმეტეს შემთხვევებში კიევი ამ შეტყობინებებზე კომენტარს არ აკეთებს. ...