დღეს, 3 სექტემბერს, დაახლოებით 13:00 საათზე თბილისში, ფეიქრების ქუჩასთან, შტადლერის ორსართულიანი მატარებელი ადამიანებს დაეჯახა. სასწრაფო-სამედიცინო დახმარების ცენტრის პრესსამსახურში რადიო თავისუფლებას უთხრეს, რომ შემთხვევის ადგილზე ორი დაღუპული ადამიანი დახვდათ. თბილისი. 3 სექტემბერი. შტადლერის მატარებელი ავარიის შემდეგ. „საქართველოს რკინიგზის“ ცხელ ხაზზე გვითხრეს, რომ ბათუმი-თბილისის მიმართულებით მოძრავი მატარებელი ამ დროისთვის გაჩერებულია. განახლება მოგვიანებით განცხადება გაავრცელა „საქართველოს რკინიგზამ“, რომელშიც ვკითხულობთ, რომ მატარებლის დაჯახების შედეგად დაღუპული ორი ადამიანი გეგმურ სამუშაოებს ასრულებდა და ისინი რკინიგზის თანამშრომლები იყვნენ. „დიდუბე-ავჭალის მონაკვეთზე მომხდარი სარკინიგზო შემთხვევის გამო გარდაიცვალა საქართველოს რკინიგზის ორი თანამშრომელი, რომლებიც გეგმურ სამუშაოებს ასრულებდნენ“, - წერია განცხადებაში. ამავე ცნობით, მატარებლის მგზავრები არ დაშავებულან. „საქართველოს რკინიგზა“ აცხადებს, რომ მომხდარის შესახებ მიმდინარეობს დეტალური მოკვლევა, ხოლო შემთხვევის ადგილზე საგამოძიებო პროცედურები, რის შემდეგაც ბათუმი-თბილისის მატარებელი დაიძვრება „თბილისი ცენტრალის“ მიმართულებით. „საქართველოს რკინიგზა“ ღრმა მწუხარებას გამოთქვამს მომხდარი ფაქტის გამო და უსამძიმრებს თანამშრომლებსა და გარდაცვლილთა ოჯახებს. სარკინიგზო შემთხვევის გამო, 3 სექტემბერს, თბილისი-ბათუმის 17:00-საათიანი რეისი გაუქმდა. „საქართველოს რკინიგზა“ აცხადებს, რომ მგზავრებს გაუქმებული რეისის ბილეთის თანხას აუნაზღაურებს. შინაგან საქმეთა სამინისტროს პრესცენტრმა რადიო თავისუფლებას აცნობა, რომ ფაქტზე გამოძიება დაიწყო სისხლის სამართლის კოდექსი 275-ე მუხლით (რკინიგზის ტრანსპორტის მოძრაობის უსაფრთხოების ან ექსპლუატაციის წესის დარღვევა). ავარიის შესახებ ცნობა თავდაპირველად გაავრცელა „ფეისბუკ“-გვერდმა „ჩემი ქალაქი მკლავს“. ...