ბელარუსის მოთხოვნით სომხეთში დაკავებული დიანა მაისეენკა გაათავისუფლეს, მაგრამ ჯერ არ აქვს ქვეყნის დატოვების უფლება, ამის შესახებ მან რადიო თავისუფლების ბელარუსულ სამსახურს განუცხადა. მაისეენკა საქართველო-სომხეთის საზღვარზე დააკავეს 2 სექტემბერს და ქალაქ ნოემბერიანის პოლიციის განყოფილებაში გადაიყვანეს. „ერთ კაბინეტში შემიყვანეს, შემდეგ მეორეში, მითხრეს რომ ინფორმაციის გაცემის უფლება არ აქვთ. მერე, როგორც მივხვდი, ოპერატიული თანამშრომელი მოვიდა და მითხრა რომ ძებნილი ვარ, წამიყვანეს ადგილობრივ პოლიციაში, იქ შეადგინეს ოქმი და მითხრეს რომ მაკავებენ სასამართლომდე 72 საათით, ბუნებრივია შოკი მივიღე“, - თქვა მან. მაისეენკას თქმით, იმავე დღეს გაუშვეს, 3 სექტემბერს ის ერევანში ადვოკატს მიმართავს. „ჩემი ექსტრადირება არ შეუძლიათ, მაგრამ ვშიშობ, რომ შეიძლება ბელარუსიდან ძალოვანები ჩამოვიდნენ და წამიყვანონ. არ ვიცი ეს რამდენად რეალურია, ამიტომ სომხეთს პოლიტიკური თავშესაფრის მოთხოვნით უკვე მივმართე“, - ამბობს მოისეენკო. ბელარუსში სისხლის სამართლის საქმე აღძრეს საზოგადოებრივი წესრიგის უხეშად დარღვევაში ან მათ მომზადებაში აქტიური მონაწილეობის ბრალდებით. 150-გვერდიანი საქმის დეტალები უცნობია. „თითქოს მამაჩემთან ერთად მონაწილეობდი საპროტესტო აქციებში“. მაისეენკა ყოფილი პოლიტპატიმრის ანრეი ივანიუშინის ქალიშვილია. ის ბელარუსიდან 2023 წელს წავიდა. ქალი არ მალავს, რომ 2020 წლის საპროტესტო აქციებში მონაწილეოდა. მაისეენკა საქართველოში ერთ წელიწადზე მეტხანს ცხოვრობდა, მას უმოგზაურია თურქეთში, სომხეთში კი იმ მიზნით იმყოფებოდა რომ საქართველოში ყოფნის ვადა განულებოდა, რასაც ხშირდა მიმართავენ ქვეყანაში ყოფნის ვადის ამოწურვის გამო. ბელარუსის ოპოზიციონერი ლიდერის სვიატლანა ციხანიუსკაის ოფისში განაცხადეს, რომ სომხეთის საგარეო საქმეთა სამინისტროსთან მუშაობენ „ლუკაშენკას რეჟიმის მიერ პოლიტიკური მოტივით ძებნილი“ დიანა მაისეენკას და სხვა ბელარუსების საქმეზე. „სვიატლანა ციხანოუსკაიას ოფისმა მიიღო რწმუნება, რომ ერევანი ლუკაშენკას რეჟიმს არ გადასცემს პოლიტიკური მოტივებით ძებნილ ბელარუსის მოქალაქეებს“. 2024 წლის თებერვალში სომხეთ-საქართველოს საზღვარზე დააკავეს ბელარუსი იაროსლავ ნოვიკოვი. ბელარუსში მის წინააღმდეგ აღიძრა სისხლის სამართლის საქმე სამხედრო სამსახურისგან თავის არიდების ბრალდებით, გასული წლის სექტემბერში ბელარუსის ხელისუფლებამ ის სახელმწიფოთაშორის ძებნილ სიაში შეიყვანა. ...