„ქართული ოცნება“ წყალტუბოში მმართველი პარტიის წევრის გარდაცვალებაში „ნაციონალურ მოძრაობას“ ადანაშაულებს. თუმცა „ნაციონალურ მოძრაობა“ აცხადებს, რომ კაცი, ვისაც „ქართული ოცნება“ ადებს ხელს, პარტიის წევრი ან მათთან დაკავშირებული არ არის. „ქართული ოცნების“ წევრი ერმილე გიგიაძე 4 სექტემბერს, ოთხშაბათს გარდაიცვალა წყალტუბოში. გამოძიება „თვითმკვლელობამდე მიყვანის“ მუხლით დაიწყო - სისხლის სამართლის კოდექსის 115-ე მუხლით. ამ მუხლით იწყება ხოლმე გამოძიება, როცა საწყის ეტაპზე არ იკვეთება დანაშაულის კვალი. მმართველი პარტია აცხადებს, რომ გიგიაძე გარდაიცვალა მას შემდეგ, რაც მოქალაქემ, როლანდ ნუცუბიძემ მას „მძიმე სიტყვიერი შეურაცხყოფა მიაყენა“, - და ამბობს, რომ ნუცუბიძე ოპოზიციის/„ნაციონალური მოძრაობის“ აქტივისტია. პროსახელისუფლებო ტელევიზიის, „იმედის“ ცნობით, ინციდენტი წყალტუბოს მუნიციპალიტეტის, სოფელ გეგუთში მოხდა, წინასაარჩევნო „კარდაკარის“ მიმდინარეობისას. „ქართული ოცნების“ ვერსიით, „კარდაკარის“ მიმდინარეობისას მათი პარტიის წევრებს „მიუვარდა“ როლანდ ნუცუბიძე და მათ შორის, როლანდ გიგიაძეს სიტყვიერი შეურაცხყოფა მიაყენა. ტელეკომპანია „იმედმა“ გამოაქვეყნა კადრები, სადაც, სავარაუდოდ, გიგიაძის გარდაცვალების ეპიზოდი ჩანს. 34-წამიან უხმო კადრებში ჩანს, რომ სოფელში „ქართული ოცნების“ ოფისთან, ტროტუარზე რამდენიმე კაცია შეკრებილი; მათ შორის არიან „ოცნების“ წევრი ერმილე გიგიაძე (მას კუბოკრული პერანგი აქცია და ქუდი ახურავს) და კაცი, რომელსაც „ოცნება“ ასახელებს, როგორც როლანდ ნუცუბიძე (შავ პერანგში). კადრებში ჩანს, რომ "ქართული ოცნების" მიერ როლანდ ნუცუბიძედ იდენტიფიცირებული კაცი და გიგიაძე კამათობენ; შემდეგ გვერდით მდგარი ახალგაზრდა კაცი ცდილობს, გიგიაძე ვითარებას გაარიდოს. რამდენიმე წამში გიგიაძე კოორდინაციას კარგავს, ცდილობს ვინმეს დაეყრდნოს, შემდეგ კი ძირს ეცემა. „ოცნების“ წყალტუბოს საკრებულოს წევრმა, გეგუთის მაჟორიტარმა შალვა კილაძემ განაცხადა, რომ სასწრაფო დახმარება დაახლოებით 15 წუთში მოვიდა, თუმცა გიგიაძე უკვე გარდაცვლილი იყო. „დაუწყო პირდაპირ ლანძღვა ერმილეს, თქვენო ეს [პარტიის ოფისი] რა გაგიკეთებიათო, ქვეყანას ღუპავთო, ჩვენ რომ მოვალთ ხელისუფლებაში, გაჩვენებთ რაც მოხდებაო“, - ამბობს კილაძე. „ნაციონალურ მოძრაობაში“ ამბობენ, რომ კაცს, რომელიც კადრებში ჩანს, პარტიასთან კავშირი არ აქვს. „არ არის დაკავშირებული ნაციონალურ მოძრაობასთან ეს პიროვნება“, - ეუბნება რადიო თავისუფლებას ირაკლი ფავლენიშვილი, საარჩევნო გაერთიანების, „ერთიანობა - ნაციონალური მოძრაობის“ გენერალური მდივნის მოადგილე. „იმ ადამიანს არ ვიცნობთ. რა შეხედულებები აქვს, ვერ გეტყვით, მაგრამ პარტიულად ეს ადამიანი არასოდეს არ უკავშირდებოდა „ნაციონალურ მოძრაობას. არანაირად არ არის დაკავშირებული პარტიასთან“, -...