კულტურის მინისტრის, თეა წულუკიანის განცხადებით, „ერთიანობა - ნაციონალური მოძრაობის“ წევრისა და ლიტერატურის მუზეუმის ხელმძღვანელის, ლაშა ბაქრაძის განცხადებასთან დაკავშირებით დისციპლინური საქმის წარმოება დაიწყეს. ამის შესახებ მან 5 სექტემბერს, ტელეკომპანია "იმედის" ეთერში ისაუბრა. "ჩვენ სამინისტროში დავიწყეთ ლიტერატურის სახელმწიფო მუზეუმის ხელმძღვანელის, ლაშა ბაქრაძის საჯარო განცხადებასთან დაკავშირებით პროცედურა, რასაც სამართლებრივ ენაზე დისციპლინური პროცედურა ჰქვია. ჩემთვის უცნობია, ბატონ ლაშას, მისი ახალი საქმიანობიდან გამომდინარე, რამდენად ახსოვს, რომ ის მუზეუმის ხელმძღვანელია, ახსოვს თუ არა ის, რომ მე ვარ მისი ხელმძღვანელი, რაც არ უნდა მიუღებელი იყოს. ჩვენ პოლიტიკური დაპირისპირებისგან არასდროს არ შეგვიქმნია პროფესიული და უწყებრივი პრობლემა. მესამე წელი დასრულდა, რაც ამ სისტემას ვხელმძრვანელობ და მისი განსხვავებული პოლიტიკური აზრი არასდროს ყოფილა ჩემი განსჯის საგანი. ყველას თავისი აზრი აქვს და ყველა ამ აზრის მიხედვით ცხოვრობს. ჩვენ ამას უფრო მეტად ყურადღება მივაქციეთ, როგორც მუზეუმის ხელმძღვანელის განცხადებას, რამდენად შეესაბამება იმ პოზიციას რაც არის", - თქვა წულუკიანმა და აღნიშნა, რომ თავად ჯერ არ გაცნობია იმ მასალებს, რომლებიც დღეს შეიქმნა სამინისტროში, თუმცა დაგეგმილი აქვთ, ხვალიდან გაეცნონ და შეაფასონ. "ასეთ დროს არის რამოდენიმე შესაძლებლობა. ერთი - ჩაითვალოს რომ პრინციპში არაუშავს, რა მოხდა, ჩაითვალოს, რომ ჩვეულებრივ ენაზე ვამბობ. სამართლებრივად, ეს სხვანაირად იქნება რა თქმა უნდა ნათქვამი, ჩაითვალოს რომ სხვადასხვა დისციპლინური სახდელიდან, ერთ-ერთი შეირჩეს და იქნება მსჯელობა... რაც შეეხება მეორე ნაწილს, ეს მიმდინარე პროცესია, წინასწარ ვერ გეტყვით რა იქნება, მაგრამ ამ გადაწყვეტილებას იღებს მინისტრი", - განაცხადა თეა წულუკიანმა. 3 სექტემბერს ვასო გოძიაშვილის სახელობის სკვერში სიტყვით გამოსვლისას ლაშა ბაქრაძემ თქვა: „არჩევანი არის ძალიან მარტივი გასაკეთებელი, მით უმეტეს, როდესაც შეხედავთ, როგორი ქალები დგანან ჩვენ გვერდით. დღეს თქვენ დაინახეთ ქალბატონი თინა, თამარი, სოფო. აი, ასეთ ადამიანებს გთავაზობთ ჩვენ და არა, ბოდიშით და, იმ „ნახმარ სახეებს“, რომლებიც აქვთ „ქართული ოცნების“ წარმომადგენლებს“. მოგვიანებით, მან განმარტა, რომ საერთოდ არ უგულისხმია ქალები და არ უცდია ქალების ერთმანეთთან დაპირისპირება, არც პარტია „ქართული ოცნების“ ქალი წარმომადგენლების შეურაცხოფა. “ერთ მხარეს ჩვენი ქალები ვახსენე, რომ ასეთი ნათელი სახეებია ჩვენს მხარეს და მეორე მხარეს საერთოდ ქალებთან დაკავშირებით არც მიფიქრია, ვიგულისხმე რომ არის უინტერესო, უღიმღამო, შეგვიძლია ვთქვათ, გაცვეთილი სახეები "ქართული ოცნების". აი, ამას ვგულისხმობდი. მეტ...