ქალაქ ზუგდიდში, დადიანის ქუჩაზე, მუშა მერვე სართულიდან ჩამოვარდა, 9-სართულიანი კორპუსის ფასადის მოპირკეთების პროცესში. რეფერალური ჰოსპიტლის კლინიკურმა დირექტორმა, სულხან ორჟონიამ რადიო თავისუფლებას განუცხადა, რომ ახალგაზრდა კაცი სამედიცინო დაწესებულებაში, სიცოცხლისთვის შეუთავსებელი დაზიანებებით, სასწრაფო დახმარების ჯგუფმა შეიყვანა. მისი გადარჩენა ვერ მოხერხდა. „შემოიყვანეს გულის გაჩერებით. ჩატარდა რეანიმაციული ღონისძიებები, მაგრამ ტრავმა აღმოჩნდა სიცოცხლისთვის შეუთავსებელი და დაფიქსირდა სიკვდილი“, - განაცხადა სულხან ორჟონიამ. რადიო თავისუფლების ინფორმაციით, დაღუპული კაცი უცხო ქვეყნის მოქალაქეა. მრავალსართულიანი კორპუსის ფასადის მოპირკეთების სამუშაოებს კერძო კომპანია ატარებს, რომელმაც მუნიციპალური განვითარების ფონდის ტენდერში გაიმარჯვა. რადიო თავისუფლება სხვა დეტალების გარკვევას ცდილობს. შემთხვევის ადგილზე საგამოძიებო მოქმედებები მიმდინარეობს. ...