რუსეთის სამხედრო ძალებმა უკრაინაზე მორიგი იერიში მიიტანეს. თავდასხმის გამო კიევის, ხარკოვის და სხვა ოლქებში საჰაერო განგაში 9 სექტემბერს, შუაღამის შემდეგ გამოცხადდა და რამდენიმე საათს გაგრძელდა. ხარკოვის მერიის ინფორმაციით, სარაკეტო შეტევის შედეგად ქალაქის ერთ-ერთ რაიონში დაზიანებულია კერძო სახლები. წინასწარი მონაცემებით, არავინ დაღუპულა. უპილოტო საფრენი აპარატებით შეტევა იყო დედაქალაქ კიევსა და კიევის ოლქზე. ადგილობრივი ხელისუფლების ინფორმაციით, უკრაინელმა სამხედროებმა ყველა დრონი მოიგერიეს. წინასწარი მონაცემებით, მსხვერპლი და ნგრევა არ არის. უკრაინის საჰაერო ძალების მიერ დილით გამოქვეყნებული მონაცემებით, მოწინააღმდეგემ გამოიყენა სამი მართვადი საავიაციო რაკეტა და რვა უპილოტო საფრენი აპარატი. საჰაერო ძალების თანახმად, უკრაინელმა სამხედროებმა ორი რაკეტა და ექვსი დრონი ჩამოაგდეს, კიდევ ორმა უპილოტო საფრენმა აპარატმა კი მართვა დაკარგა. ასევე ნახეთ ერთ თვეში უკრაინაში დაიღუპა სულ მცირე 184 მშვიდობიანი მოქალაქე დრონებით და რაკეტებით შეტევის შესახებ იუწყებიან რუსეთის ბელგოროდის და კურსკის ოლქების გუბერნატორები. ორივე რეგიონი უკრაინას ესაზღვრება. კურსკის ოლქში აგვისტოს დასაწყისიდან მიმდინარეობს უკრაინის სახმელეთო ოპერაციაც. ბელგოროდის ოლქის გუბერნატორმა ვიაჩესლავ გლადკოვმა დღეს, 9 სექტემბერს დილით ტელეგრამზე დაწერა, რომ უკრაინის შეიარაღებულმა ძალებმა 18 უპილოტო საფრენი აპარატით შეუტიეს ბლგოროდის ოლქის ექვს რაიონს, სადაც დაზიანებულია 20-მდე მრავალბინიანი და კერძო სახლი და ხანძარი გაუჩნდა საწავავის საცავს. კურსკის ოლქის გუბერნატორის მოვალეობის შემრულებლის ალექსეი სმირნოვის თანახმად, რუსეთის საჰაერო თავდაცვის ძალებმა ორი უკრაინული რაკეტა მოიგერიეს. სმირნოვი შედეგების შესახებ არაფერს იუწყება. საომარი მოქმედებების პირობებში მხარეთა მიერ გავრცელებული ცნობების დამოუკიდებელი წყაროებით გადამოწმება გართულებულია. ...