რუსეთის თავდაცვის სამინისტროს მიერ დილით გამოქვეყნებული ინფორმაციის მიხედვით, 10 სექტემბერს, შუაღამის შემდეგ უკრაინამ რუსეთზე დრონებით ერთ-ერთი ყველაზე მასირებული შეტევა მიიტანა. თავდაცვის სამინისტროს თანახმად, საჰაერო თავდაცვის საშუალებებით 9 რეგიონში გაანადგურეს 144 უკრაინული უპილოტო საფრენი აპარატი, მათგან 72 - ბრიანსკის ოლქში, 20 - მოსკოვის ოლქში, 14 - კურსკში, 13 - ტულის ოლქში, 8 - ბელგოროდში, 7 - კალუგის ოლქში, 5 - ვორონეჟში, 4 - ლიპეცკის ოლქში და 1 - ორიოლში. რუსეთის ამ რეგიონებიდან მხოლოდ მოსკოვის ოლქის გუბერნატორმა განაცხადა, რომ დრონებით შეტევას მსხვერპლი და ნგრევა მოჰყვა. ანდრეი ვორობიოვის ინფორმაციით, ქალაქ რამენსკოეში დრონები მოხვდა ორ მრავალბინიან სახლს, დაიღუპა ერთი და დაშავდა ოთხი ადამიანი. ასევე ნახეთ მოსკოვსა და მის შემოგარენზე დრონებით შეტევა იყო უკრაინის საჰაერო ძალების მიერ დილით გამოქვეყნებული მონაცემებით, ღამის განმავლობაში რუსეთის საოკუაციო ძალებმა უკრაინაზე იერიში მიიტანეს 2 რაკეტით და 46 უპილოტო საფრენი აპარატით. საჰაერო ძალების თანახმად, უკრაინელმა სამხედროებმა ჩამოაგდეს 38 დრონი, 3 უკრაინის მიერ კონტროლირებული ტერიტორიიდან გავიდა რუსეთის და ოკუპირებული ლუგანსკის ოლქის მიმართულებით, 3 კი „ლოკალურად დაიკარგა“. რუსეთის მორიგი შეტევის გამო საჰაერო თავდაცვის სისტემა ამოქმედებული იყო კიევის, ვინიცის, ჩერნიგოვის, კიროვოგრადის, ნიკოლაევის, ოდესის, ხერსონის, ჩერკასის, სუმის, დნეპროპეტროვსკის, ხარკოვის, ზაპოროჟიეს და პოლტავის ოლქებში. ჩერკასის საოლქო-სამხედრო ადმინისტრაციის ინფორმაციით, უკრაინის საჰაერო ძალების მიერ მოუგერიებელმა დრონებმა დააზიანა ინფრასტრუქტურის ობიექტი და რამდენიმე სახლი, დაშავდა 2 ადამიანი. საომარი მოქმედებების პირობებში მხარეთა მიერ გავრცელებული ცნობების დამოუკიდებელი წყაროებით გადამოწმება გართულებულია. ...