10 სექტემბრის დილას საქართველოს პარლამენტის შენობის წინ ბანერით და კარვით მივიდა სამი შვილის დედა, თარჯიმანი და გიდი თამთა ჟვანია. ბანერზე, რომელიც მან საკანონმდებლო ორგანოსთან გაშალა, ორი კითხვა და ძალადობის საწინააღმდეგო სლოგანი წერია. "რატომ არ არის მოძალადე დასჯილი ამდენი ხანი? დამიბრუნეთ ძალით წართმეული შვილი! " - საჯარო სივრცეში გამოტანილი ამ ტექსტით სამი შვილის დედა ითხოვს მისი ყოფილი ქმრის წინააღმდეგ დაწყებული სასამართლო დავების დროულად დასრულებას და საქმის ეფექტურ გამოძიებას, რომელიც დაადგენს როგორ შეიძლება მისი არასრუწლოვანი შვილი რჩებოდეს მამასთან, რომელიც მასზე სავარაუდოდ ფსიქოლოგიურად ძალადობს. ფსიქოლოგების დასკვნით, ბავშვს რომელიც სასამართლოს გადაწყვეტილებით მამასთან ცხოვრობს, "არადამაკმაყოფილებელი ფსიქო-ემოციური მდგომარეობა აქვს". თამთა ჟვანია რამდენიმე თვე, მარტოდმარტო მართავდა საპროტესტო აქციებს ოზურგეთის სასამართლოს წინ, სადაც მისი სარჩელების განხილვა მიმდინარეობს. ოზურგეთში ცხოვრობს მისი ყოფილი ქმარი მათ საერთო შვილთან ერთად. თამთა ჟვანიას და მისი შვილის მიმართ ძალადობის საქმის განხილვა ოზურგეთის სასამართლოში უკვე მესამე წელია მიდის. თბილისში პროტესტის გადმოტანის მიზანი უფრო მეტ ადამიანამდე თავისი მოთხოვნების მოტანაა - ამ ეტაპზე თამთას სურს კვალიფიციურმა ექსპერტიზამ შეაფასოს მისი შვილის ფსიქო-ემოციური მდგომარეობა და დაადგინოს, არის თუ არა ის მამის მხრიდან ძალადობის მსხვერპლი. თამთა ჟვანია საქართველოს პარლამენტის წინ თამთას სამი შვილი ჰყავს - პირველი ქორწინებიდან ჰყავს ორი, მათ შორის - ერთი არასრულწლოვანი, რომელიც ამჟამად დედას ცხოვრობს, მესამე კი, 6 წლის გოგონა, რომლის დასაბრუნებლადაც ახლა ბრძოლა უწევს, მეორე ქორწინებიდან ჰყავს. დედასთან ურთიერთობა ბავშვს მამამ სამი წლის წინ, თამთას ემიგრაციაში ყოფნის დროს აუკრძალა, სადაც ის სამუშაოდ ქმრის დაჟინებული მოთხოვნით იყო წასული. სწორედ ემიგრაციაში ყოფნისას წამოიწყო თამთამ სამართლებრივი დავა მეუღლის წინააღმდეგ მას შემდეგ, რაც შუათანა შვილმა, (რომელიც იმჟამად მამინაცვალთან ცხოვრობდა) ტელეფონზე საუბრისას უთხრა, რომ ის მამინაცვლის მხრიდან ფიზიკური ძალადობის მსხვერპლი იყო. თამთასაც და მის შვილსაც დაზარალებულის სტატუსი აქვთ, თუმცა მოძალადე კაცი სასამართლოს საბოლოო გადაწყვეტილებამდე გირაოს სანაცვლოდ დაკავებიდან მეორე დღესვე გაათავისუფლეს. ასევე ნახეთ შვილის დასაბრუნებლად: ყოფილი ემიგრანტი დედა სისტემის პირისპირ ...