თბილისის ერთ-ერთ კლინიკაში გარდაიცვალა 15 წლის მოზარდი, რომელიც 20 დღის წინ დედოფლისწყაროში, მშენებარე პარკის ხელოვნურ ტბაში შეუძლოდ გახდა. მოზარდის გარდაცვალების შესახებ ინფორმაცია ოჯახის ახლობლებმა სოციალური ქსელებით გაავრცელეს. ადგილობრივების ინფორმაციით, მიმდინარე წლის 21 აგვისტოს დედოფლისწყაროს მშენებარე ცენტრალური პარკის ხელოვნურ ტბაში არასრულწლოვანები ცურავდნენ, რა დროსაც ერთ-ერთი მათგანი შეუძლოდ გახდა. ადგილზე სასწრაფო-სამედიცინო დახმარების ჯგუფი გამოიძახეს. მათ მოზარდი ჯერ ადგილობრივ კლინიკაში მიიყვანეს, შემდეგ კი თბილისში გადაიყვანეს უგონო მდგომარეობაში. რადიო თავისუფლების ინფორმაციით, მომხდარის შემდეგ მშენებარე პარკში უსაფრთხოების ზომები გამკაცრდა და ტერიტორიაზე მშენებლების გარდა არავის უშვებენ. რადიო თავისუფლება 21 აგვისტოსაც და დღესაც უშედეგოდ ცდილობდა დაჰკავშირებოდა დედოფლისწყაროს მუნიციპალიტეტის მერიას იმის გასარკვევად, როგორ მოხვდნენ მოზარდები პარკში, რომლის მშენებლობაც არ არის დასრულებული. შინაგან საქმეთა სამინისტრო მომხდარის დეტალებზე არ ლაპარაკობს. მედიისთვის უცნობია გამოიკვეთა თუ არა ვინმეს ბრალეულობა. უწყების პრესსამსახურში მხოლოდ ის გვითხრეს, რომ გამოძიების ფარგლებში რამდენიმე პირი გამოჰკითხეს. მომხდარზე გამოძიება მიმდინარეობს სისხლის სამართლის კოდექსის 115-ე, თვითმკვლელობამდე მიყვანის მუხლით. დედოფლისწყაროში 17 ჰექტრამდე ტერიტორიაზე ახალი პარკის მოწყობა 2022 წელს დაიწყო. პროექტის მიხედვით, პარკში უნდა მოეწყოს სპორტული და საბავშვო მოედნები, რესტორნები, შემეცნებითი და გასართობ ობიექტები, ასევე ხელოვნური ტბა. პროექტის ბიუჯეტი 14 მილიონი ლარია, სამუშაოები ამ დრომდე არ არის დასრულებული. საგანგებო სიტუაციების მართვის სამსახურის მონაცემებით, 2022 წლიდან 2024 წლის 19 აგვისტოს ჩათვლით საქართველოში წყალში 173 ადამიანი დაიხრჩო, მათ შორის 25 არასრულწლოვანი. ეს მონაცემები საგანგებო სიტუაციების მართვის სამსახურმა პარლამენტის დეპუტატ ანა ნაცვლიშვილის კითხვის პასუხად გაავრცელა. კითხვა წყალზე სიკვდილიანობის ბოლო 3 წლის სტატისტიკას ეხებოდა: 2022 წელი - 58 შემთხვევა (8 არასრულწლოვანი); 2023 წელი - 74 შემთხვევა (13 არასრულწლოვანი); 2024 წლის 19 აგვისტომდე - 41 შემთხვევა (4 არასრულწლოვანი). ...