„აგენტების კანონის“ საწინააღმდეგო აქციის მონაწილე, 23 წლის საბა მეფარიშვილი, რომელსაც ბრალად ედება პარლამენტის შენობის წინ დროებითი რკინის კონსტრუქციის დაზიანება, ადმინისტრაციული წესითაც დააჯარიმეს. 10 სექტემბერს თბილისის საქალაქო სასამართლოს მოსამართლემ ირაკლი ჩიკაშუამ მეფარიშვილი 2 000 ლარით დააჯარიმა. პროცესი კი 16 აგვისტოს გაიმართა. არასამთავრობო ორგანიზაცია „დემოკრატიის კვლევის ინსტიტუტის“ (DRI) ადვოკატმა თათია კონიაშვილმა, რომელიც მეფარიშვილის ინტერესებს იცავს, რადიო თავისუფლებას უთხრა, რომ ადმინისტრაციული და სისხლის სამართლის საქმეები უკავშირდება ერთსა და იმავე დღეს, 14 მაისს, როდესაც პარლამენტმა მე-3 მოსმენით მიიღო ე.წ. აგენტების კანონი. ასევე ნახეთ სია: 84 დეპუტატი, რომლებმაც „აგენტების კანონს“ მესამე, საბოლოო მოსმენით, მხარი დაუჭირეს როგორც ადვოკატმა გვითხრა, საბა მეფარიშვილი იმ დღეს, როდესაც რკინის კონსტრუქცია დაზიანდა, დააკავეს ადმინისტრაციული წესით, 166-ე (წვრილმანი ხულიგნობა) და 173-ე (პოლიციის კანონიერი მოთხოვნისადმი დაუმორჩილებლობა) მუხლებით. დაახლოებით დღე-ნახევარში ის გაათავისუფლეს და 16 მაისს მეორედ დააკავეს და უკვე ბრალი წარუდგინეს სისხლის სამართლის წესით. თათია კონიაშვილის თქმით, ადმინისტრაციულ საქმეზე მოსამართლე ირაკლი ჩიკაშუა მხოლოდ პოლიციელების ჩვენებებს დაეყრდნო, რომელიც, ადვოკატის შეფასებით, ურთიერთგამომრიცხავი იყო. „შსს-ს წარმომადგენელი საუბრობდა, რომ პარლამენტის შენობასთან განთავსებული დროებითი კონსტრუქციის წინ ვითომ იყო სპეცრაზმის კორდონი, რომლის გარღვევასაც საბა ცდილობდა. ეს აბსურდია, რადგან სისხლის სამართლის საქმის მასალებში ჩანს, რომ დროებითი კონსტრუქციის წინ პოლიციელები არ იდგნენ, [მოქალაქეები] უბრალოდ აზიანებენ რკინის კონსტრუქციას, შემდეგ პარლამენტის შენობის მხრიდან გამოვიდნენ სპეცრაზმელები და საბა მეფარიშვილი დააკავეს. ერთმა პოლიციელებმა თქვა, რომ რკინის კონსტრუქციის შიგნით იდგნენ და ხედავდნენ რას აკეთებდა საბა, შემდეგ კი გამოვიდა სამართალდამცველთა კორდონი და დადგა. შსს-ს კიდევ ერთმა წარმომადგენელმა კი აღნიშნა, რომ ეს კორდონი თავიდანვე იდგა წინ, მაგრამ ამ შემთხვევაში აბსურდი გამოდის, თითქოს კორდონის უკან იდგა საბა მეფარიშვილი და რაღაცას აზიანებდა“, - გვითხრა ადვოკატმა და დაამატა, რომ შსს-ს მიერ პროცესზე წარდგენილ 60-წამიან ვიდეომტკიცებულებაში მხოლოდ დაკავების კადრები არის ასახული და იქ სპეცრაზმის კორდონი არ ჩანს. ადვოკატები მოგვიანებით მიიღებენ გადაწყვეტილებას, გაასაჩივრონ თუ არა ადმინისტრაციული წესით მეფარიშვილის 2 000 ლარით დაჯარიმების გადაწყვეტილება. ასევე ნახეთ „არ მახსოვს, ოქმში მიწერია“, - რეპორტაჟი 400-ლარიანი რკინის ჯებირების საქმის სასამართლოდან რაც შეეხება მეფარიშვილის წინა...