აშშ-ის სახელმწიფო მდივანი, ენტონი ბლინკენი აცხადებს, რომ ირანმა რუსეთს გადასცა ბალისტიკური რაკეტები და მოელის, რომ რამდენიმე თვეში მოსკოვი მათ გამოყენებას შეძლებს. ეს ბლინკენმა განაცხადა ლონდონში ვიზიტისას. სახელმწიფო მდივანი თვლის, რომ რუსეთსა და ირანს შორის თანამშრომლობა ემუქრება უფრო ფართო ევროპულ უსაფრთხოებას. ლონდონში პრესკონფერენციაზე გამოსვლისას, თავის ბრიტანელ კოლეგა დევიდ ლემისთან ერთად, კიევში გამგზავრებამდე ბლინკენმა გამოაცხადა ასევე ირანისთვის ახალი სანქციების დაწესების შესახებ. აშშ-მა 10 სექტემბერს ირანის მიმართ სანქციების სიას დაუმატა ათი ფიზიკური და ექვსი იურიდიული პირი, რომლებიც ირანს და რუსეთში მდებარეობენ და განსაზღვრა ოთხი ხომალდი, როგორც გაყინული ქონება, რომელსაც ირანი, აშშ-ის ფინანსთა სამინისტროს თანახმად, იყენებს რუსეთისთვის იარაღის და შეიარაღების სისტემების კომპონენტების მიწოდებისთვის. აშშ-ის თანახმად, მათ შორის არის დრონები და ახლო მოქმედების ბალისტიკური რაკეტები.რაკეტების მიწოდების შესახებ საუბრისას, ბლინკენმა მოიხმო დაზვერვის მონაცემები, რომელიც მისი თქმით, აშშ-ის მოკავშირეებს და პარტნიორებს გადაეცა მთელ მსოფლიოში. ირანისგან რაკეტების მიღებით, რუსეთი, ბლინკენის თქმით, შეძლებს თავისი არსენალის უფრო იმ მიზნებისთვის გამოყენებას, რომლებიც ფრონტის ხაზიდან მოშორებით მდებარეობს. ევროკავშირმა 9 სექტემბერს "სანდო" უწოდა მოკავშირეების მხრიდან მიწოდებულ ინფორმაციას, რომლის თანახმადაც ირანმა მოსკოვს უკრაინაში რუსეთის მიერ წარმოებული ომისთვის მიაწოდა მოკლე რადიუსის რაკეტები - და მიანიშნა, რომ ამას "სწრაფი" პასუხი გაეცემა. "გვაქვს სანდო ინფორმაცია, მოკავშირეების მხრიდან, ირანის მიერ რუსეთისთვის ბალისტიკური რაკეტების მიწოდების შესახებ" - ამბობს ევროკავშირის პრესმდივანი, პეტერ სტანო. "ამ საკითხს წევრ ქვეყნებთან ერთად შევისწავლით და, დადასტურების შემთხვევაში, ეს მიწოდება იქნება მნიშვნელოვანი მატერიალური ესკალაცია, ირანის მხრიდან მხარდაჭერაში რუსეთის უკანონო, აგრესიის ომისა უკრაინის წინააღმდეგ". ირანის მიერ რუსეთისთვის რაკეტების მიწოდებაზე გასულ კვირაში დასავლეთის პრესაც წერდა: ამის შესახებ 8 სექტემბერს წერდა Associated Press-ი ორ წყაროზე დაყრდნობით, რომლებიც იცნობენ ვითარებას. სააგენტოსთან მოსაუბრეებს, რომელთაც ანონიმურობის შენარჩუნება მოითხოვეს, არ დაუზუსტებიათ, რამდენი ერთეული იქნა მიწოდებული, ან როდის შეიძლებოდა მომხდარიყო მათი გადაცემა. უკრაინის საგარეო საქმეთა სამინისტრომ გამოხატა ღრმა შეშფოთება ცნობის გამო, რომელიც მედიამ გაავრცელა რუსეთისთვის ირანის მიერ ბალისტიკური რაკეტების მიწოდების შესახებ და განაცხადა, რომ თუ ეს ინფორმაცია დადასტურდება, მათ ექნებათ "დამანგრეველი შედეგები" უკრაინა-ირანი...