ოკუპირებული ცხინვალის რეგიონის ე.წ. უშიშროების კომიტეტი (КГБ) იუწყება, რომ 5 სექტემბერს დააკავეს ტაჯიკეთის ორი მოქალაქე, მათ დე ფაქტო საზღვრის დარღვევას ედავებიან. ე.წ. უშიშროების კომიტეტის ცნობაში მითითებულია, რომ ტაჯიკეთის მოქალაქეები, მათ შორის ერთი არასრულწლოვანია, ცხოვრობენ ქარელის მუნიციპალიტეტის სოფელ დირბში. „დადგენილია, რომ აღნიშნულ უცხოელებს გზა აებნათ და წინასწარი განზრახვის გარეშე დაარღვიეს საქართველოსთან სამხრეთ ოსეთის სახელმწიფო საზღვარი, ზნაურის რაიონის დასახლებული პუნქტის გვირგვინას სიახლოვეს“,- ნათქვამია განცხადებაში. დღეს, 11 სექტემბერს ცხინვალის ე.წ. სასამართლომ ტაჯიკეთის მოქალაქეები დამნაშავედ ცნო ადმინისტრაციულ სამართალდარღვევაში, მათ ჯარიმა და ადმინისტარციული გაძევება შეეფარდათ, და „გადაეცემათ საქართველოს ხელისუფლებას“, - ნათქვამია დე ფაქტო უწყების განცხადებაში. ქართულ მხარეს ჯერჯერობით კომენტარი არ გაუკეთებია. ...