ნიუ-იორკში, პენტაგონსა და პენსილვანიაში ხსოვნის ცერემონიები გაიმართა იმ ტერორისტული თავდასხმების წლისთავთან დაკავშირებით, რომელსაც 2001 წელს თითქმის 3000 ადამიანი ემსხვერპლა. პრეზიდენტმა ჯო ბაიდენმა, ვიცე-პრეზიდენტმა კამალა ჰარისმა და ყოფილმა პრეზიდენტმა დონალდ ტრამპმა ოთხშაბათს ნიუ-იორკში 11 სექტემბრის მსხვერპლთა ხსოვნას პატივი ერთად მიაგეს. კამალა ჰარისმა, ამერიკელი დემოკრატიული საპრეზიდენტო კანდიდატმა და დონლად ტრამპმა, მისმა რესპუბლიკელმა მეტოქემ 5 ნოემბრის საპრეზიდენტო არჩევნებში, ერთმანეთს ხელი ჩამოართვეს და რამდენიმე სიტყვა გაცვალეს. ცერემონიას ნიუ-იორკში ესწრებოდნენ რესპუბლიკელი ვიცე-პრეზიდენტობის კანდიდატი სენატორი ჯეი დი ვანსი, ასევე ნიუ-იორკის ყოფილი მერი მაიკლ ბლუმბერგი. „ამერიკის ხმის“ თანახმად ცერემონიის დროს ოფიციალური გამოსვლების ნაცვლად იმ ადგილას, სადაც ტერორისტული ორგანიზაცია ალ-ყაიდის თვითმკვლელი ტერორისტების მიერ პილოტირებული თვითმფრინავები მსოფლიო სავაჭრო ცენტრის ტყუპ კოშკებს შეეჯახნენ, ტრაგედიის მსხვერპლთა ცოლებმა, ქმრებმა, დებმა, ძმებმა და შვილიშვილებმა 23 წლის წინ დაღუპულთა სახელები წაიკითხეს. ასევე ნახეთ აშშ-ის თავდაცვის მდივანმა გააუქმა საპროცესო შეთანხმება 11 სექტემბრის ტერაქტების ორგანიზატორთან ტერაქტების მსხვერპლებს პენტაგონშიც იხსენებენ და პენსილვანიის იმ მინდორზეც, სადაც ერთ-ერთი თვითმფრინავი მას შემდეგ ჩამოვარდა, რაც მგზავრებმა ტერორისტებს წინააღმდეგობა გაუწიეს. "ამ დღეს 23 წლის წინ ტერორისტებს სჯეროდათ, რომ მათ შეეძლოთ ჩვენი ნების გატეხვა და დაჩოქება. ისინი შეცდნენ. ისინი ყოველთვის შეცდებიან. ყველაზე ბნელ საათებში ჩვენ სინათლისკენ მივდიოდით. და შიშის ფონზე, ჩვენ გავერთიანდით ჩვენი ქვეყნის დასაცავად და ერთმანეთის დასახმარებლად", - განაცხადა პრეზიდენტმა ჯო ბაიდენმა დილას გამართულ ხსოვნის ცერემონიაზე. 2001 წლის 11 სექტემბერს, ისლამისტების მიერ გატაცებული სამი სამგზავრო თვითმფრინავი ნიუ-იორკში შეეჯახა მსოფლიო სავაჭრო ცენტრის ცათამბჯენებს და ვაშინგტონში - პენტაგონს. მეოთხე გატაცებული თვითმფრინავი პენსილვანიის შტატში ჩამოვარდა. ქვეყნის ისტორიაში უდიდეს ტერაქტს 3000-მდე ადამიანის სიცოცხლე ემსხვერპლა. ტერაქტზე პასუხისმგებლობა აიღო რადიკალურმა ისლამისტურმა ორგანიზაცია „ალ ყაიდამ“. 11 სექტემბრის ტერაქტს მოჰყვა აშშ-ის ანტიტერორისტული სამხედრო ოპერაცია ავღანეთში, პაკისტანსა და ერაყში. ასევე ნახეთ 11 სექტემბრის ტერაქტების ორგანიზებაში ბრალდებული გამოძიებასთან გარიგებას დასთანხმდა ...