69 წლის ასაკში, მოსკოვში გარდაიცვალა ცნობილი ჟურნალისტი და საზოგადო მოღვაწე ნიკოლაი სვანიძე. მას 2023 წელს თავის ტვინის იშემიის დიაგნოზი დაუსვეს. ზოგიერთი რუსული მედიასაშუალების ცნობით, ნიკოლაი სვანიძე 11 სექტემბერს გარდაიცვალა სავარაუდოდ, პნევმონიით გამოწვეული გართულების შედეგად. ნიკოლაი სვანიძე 1955 წლის 2 აპრილს მოსკოვში დაიბადა. 1977 წელს დაამთავრა მოსკოვის სახელმწიფო უნივერსიტეტის ისტორიის ფაკულტეტი. 90-იან წლებში მუშაობა დაიწყო რუსეთის ტელევიზიაში. იყო არაერთი ანალიტიკური პროგრამის ავტორი და წამყვანი. 2013-2022 წლებში იყო რადიოსადგურ „სერებრიანი დოჟდის“ წამყვანი. უკრაინაში რუსეთის ფართომასშტაბიანი შეჭრის დღეს, 2022 წლის 24 თებერვალს ნიკოლაი სვანიძემ განაცხადა, რომ ეს „არამოტივირებული და არაპროვოცირებული თავდასხმაა" და შემდეგაც არაერთხელ უსაუბრია რუსეთისთვის ამ „სისხლიანი ომის“ შედეგებზე. ასევე ნახეთ პუტინმა ადამიანის უფლებათა საბჭოდან ჟურნალისტი ნიკოლაი სვანიძე და კიდევ რამდენიმე ცნობილი პირი გარიცხა ნიკოლაი სვანიძე იყო ადამიანის უფლებათა საბჭოს წევრი, საიდანაც პრეზიდენტმა პუტინმა 2022 წლის ნოემბერში დაითხოვა სხვა ჟურნალისტებთან და უფლებადამცველებთან ერთად და მათ ნაცვლად საბჭოში შეიყვანა ომის მხარდამჭერები. 2022 წლის დეკემბერში ნიკოლაი სვანიძე გაათავისუფლეს რუსეთის სახელმწიფო ჰუმანიტარული უნივერსიტეტის მასმედიის და რეკლამის ინსტიტუტის დირექტორის თანამდებობიდან, რომელსაც 12 წლის განმავლობაში იკავებდა. ...