ტორონტოს საერთაშორისო კინოფესტივალის ორგანიზატორებმა უარი თქვეს პროგრამიდან ამოეღოთ რუსი დოკუმენტალისტის, ანასტასია ტროფიმოვას ფილმი „რუსები ომში“, რომლის მთავარი გმირები უკრაინის წინააღმდეგ ომის მონაწილე რუსი ჯარისკაცები არიან. უკრაინის ხელისუფლება ამ დოკუმენტურ ფილმს რუსეთის ფართომასშტაბიანი შეჭრის გამართლების მცდელობად აფასებს. უკრაინელი აქტივისტები და კინოს წარმომადგენლები ხაზს უსვამენ, რომ ფილმის ავტორი წარსულში მუშაობდა რუსულ პროპაგანდისტულ ტელეკომპანია RT-ში. თავად ანასტასია ტროფიმოვა ირწმუნება, რომ ომის წინააღმდეგ მიმართული ფილმი რუსეთის თავდაცვის სამინისტროსთან შეუთანხმებლად გადაიღო. უკრაინის პროტესტის მიუხედავად, „რუსები ომში“ 6 სექტემბერს აჩვენეს ვენეციის საერთაშორისო კინოფესტივალზე. 11 სექტემბერს იგივე გადაწყვეტილება მიიღეს კანადაშიც, ტორონტოს საერთაშორისო კინოფესტივალის ორგანიზატორებმაც. ერთი დღით ადრე ტორონტოში გაიმართა საპროტესტო აქცია, რომლის მონაწილეები მოითხოვდნენ საფესტივალო პროგრამიდან ფილმის ამოღებას. ასევე ნახეთ “ჩვეულებრივი ბიჭები” - ვენეციაში აჩვენეს "პროვოკაციული" ფილმი რუს ჯარისკაცებზე ტორონტოს კინოფესტივალის ვებსაიტზე გამოქვეყნებული განცხადების მიხედვით, კანადის და საფრანგეთის თანადაფინანსებით გადაღებული „რუსები ომში“ პროპაგანდისტულ ფილმად ვერ ჩაითვლება, რადგან ის რუსეთის სამთავრობო დაწესებულებების ნებართვის და მონაწილეობის გარეშეა გადაღებული. ფესტივალის ორგანიზატორების თანახმად, პატივს სცემენ ფილმის გამო გამოთქმულ შეშფოთებას და დისკუსიას და კარგად ესმით და განიცდიან უკრაინელების ტანჯვას, თუმცა, ამასთან ერთად მხარს უჭერენ კულტურის სფეროს წარმომადგენელთა უფლებას, თავისუფლად გამოთქვან კეთილსინდისიერი პოლიტიკური პოზიცია და ცენზურას ეწინააღმდეგებიან. ანასტასია ტროფიმოვას დოკუმენტურ ფილმს ტორონტოს საერთაშორისო კინოფესტივალზე ამ კვირაში აჩვენებენ. გადაწყვეტილებას ამაზრზენი უწოდა უკრაინის გენერალურმა კონსულმა ტორონტოში ოლეგ ნიკოლენკომ. მისი განცხადებით, ტროფიმოვა ფრონტზე მუშაობას და ფილმის გადაღებას რუსეთის ხელისუფლების ნებართვის გარეშე ვერ შეძლებდა. ...