ცენტრალური საარჩევნო კომისიის თავმჯდომარე გიორგი კალანდარიშვილი ტელეკომპანია „პირველის“ „ერთ- ერთი წარმომადგენელს“ საარჩევნო ადმინისტრაციის თანამშრომლებზე სავარაუდო ზეწოლის მიზნით „მათი პერსონალური მონაცემების კანონის საწინააღმდეგოდ დამუშავებისა და გამოყენების“ მცდელობაში ადანაშაულებს. ტვ "პირველის" საინფორმაციო სამსახურის ხელმძღვანელი ნოდარ მელაძე კი ცენტრალური საარჩევნო კომისიის თავმჯდომარეს ჟურნალისტებზე ზეწოლაში. როგორც კალანდარიშვილმა თქვა ცესკოში გამართულ ბრიფინგზე, ტელეკომპანია "პირველის" ჟურნალისტებს საარჩევნო ადმინისტრაციის თანამშრომლებთან დაკავშირებით ინფორმაცია არ მოუთხოვიათ და გაუგებარია რა საჯარო ინტერესს წარმოადგენს მათ შესახებ ინფორმაციის დამუშავება. “როცა სახეზე არ არის საარჩევნო ადმინისტრაციის თანამშრომელთა პერსონალური ინფორმაციის – ნათესაური კავშირებისა და აღნიშნული ნათესავების დასაქმების ადგილების დამუშავების სამართლებრივი საფუძვლები და ლეგიტიმური მიზანი, ცხადია, ეს ობიექტურ კითხვებს აჩენს. ხსენებული მედიასაშუალების წარმომადგენლების მიერ საარჩევნო ადმინისტრაციის თანამშრომლების თუ მათი ოჯახის წევრების მიმართ დასმული კითხვების შინაარსი და ფორმა, შეუძლებელია, ემსახურებოდეს რაიმე საჯარო ინტერესს, გარდა იმისა, რომ განხორციელდეს საარჩევნო ადმინისტრაციის თანამშრომლების მმართველ პარტიასთან დაკავშირების მცდელობა, მიკერძოებულად მათი საქმიანობის წარმოჩენა მათი ნათესავების სხვადასხვა უწყებაში საქმიანობის ან შესაძლო საქმიანობის გამო და ამით დაზიანდეს საარჩევნო ადმინისტრაციის რეპუტაცია, რაც, თავის მხრივ, ხელს შეუშლის არჩევნების მოდერნიზების მნიშვნელოვან პროცესს და დააზიანებს საარჩევნო გარემოს”, - განაცხადა გიორგი კალანდარიშვილმა. მისი თქმით, არც ნათესაური კავშირები და არც ოჯახის წევრების ან ნათესავების საქმიანობა, კანონით არ შეიძლება იყოს საარჩევნო ადმინისტრაციის არცერთი თანამშრომლის საქმიანობის შეფასების კრიტერიუმი. “საარჩევნო მოხელეები საკუთარ საქმიანობას წარმართავენ კანონმდებლობის შესაბამისად და კეთილსინდისიერად. ჩართულმა მხარეებმა კი მათი საქმიანობა უნდა შეაფასონ სწორედ ქმედებებით და არა - მათი ნათესაური კავშირებით“, - თქვა ცესკოს თავმჯდომარემ. გიორგი კალანდარიშვილის თქმით, “საარჩევნო ადმინისტრაცია თანამშრომლებზე ზეწოლას არ დაუშვებს და ყოველ ფაქტთან დაკავშირებით მიღებული იქნება კანონით გათვალისწინებული ზომები” ტვ პირველის საინფორმაციო სამსახურის უფროსი ნოდარ მელაძე მიიჩნევს, რომ ცენტრალური საარჩევნო კომისიის თავმჯდომარე ჟურნალისტებზე ზეწოლას ახდენს და მუქარით ცდილობს შაბათის ეთერის გუნდი აიძულოს არ მოამზადონ სიუჟეტები ცესკოს საქმიანობაზე. ნოდარ მელაძის განცხადებით, პერსონალური ინფორმაციის დამუშავება არ არის რესპონდენტის ტელეფო...