კინოცენტრის ცნობით, 12 სექტემბერს მათ მიერ დადგენილი სპეციალური კომისიის წევრებმა ფარული კენჭისყრის საფუძველზე შეარჩიეს გამარჯვებული ფილმი. როგორც ცენტრი იუწყება, ხმები შემდეგნაირად გადანაწილდა: ჟიურის ოთხმა წევრმა ხმა დეა კულუმბეგაშვილის ფილმ „აპრილს” მისცა, ხოლო ხუთი ხმით კონკურსში გამარჯვებული რუსუდან გლურჯიძის ფილმი გახდა. კინოცენტრის განცხადებით, კონკურსში საპროდიუსერო კომპანიებისგან წარდგენილი იყო ხუთი ფილმი: „სიცოცხლიდან სიცოცხლემდე“ (რეჟისორი და პროდიუსერი - ბექა სიხარულიძე); „კაცი რომელიც ჯიხურთან იდგა“ (რეჟისორი დავით ქაფიაშვილი; პროდიუსერი ხათუნა ვაშაძე); „ეშმაკის სამოთხე“ (რეჟისორი ხათუნა ვაშაძე; პროდიუსერი გიორგი აზნაური); „ანტიკვარიატი“ (რეჟისორი რუსუდან გლურჯიძე, პროდიუსერი ზურაბ მაღალაშვილი) და „აპრილი“ (რეჟისორი დეა კულუმბეგაშვილი, პროდიუსერი არჩილ გელოვანი). სპეციალური კომისია, რომელმაც საქართველოდან „ოსკარზე“ წარსადგენი ფილმი შეარჩია, საქართველოს ეროვნული კინოცენტრის დირექტორის ინდივიდუალური ადმინისტრაციულ-სამართლებრივი აქტით დაკომპლექტდა და მის შემადგენლობაში შედიოდნენ: ზაზა შათირიშვილი (კულტურისა და კინოს მკვლევარი); ვლადიმერ კაჭარავა (პროდიუსერი); ედმონდ მინაშვილი (პროდიუსერი); ლევან გიგინეიშვილი (ფილოსოფოსი); ნიკოლოზ შენგელაია (კინომხატვარი); ხათუნა ხუნდაძე (პროდიუსერი); გიორგი ჭუმბურიძე (რეჟისორი); ბაჩო ოდიშარია (კინოცენტრის ფილმწარმოების დეპარტამენტის უფროსი); გიორგი ცხვედიანი (კინოცენტრის კინოექსპორტის დეპარტამენტის უმცროსი სპეციალისტი). რუსუდან გლურჯიძის ფილმი "ანტიკვარიატი" 2006 წელს რუსეთის მხრიდან ეთნიკური ნიშნით ქართველთა მასობრივ უკანონო დეპორტაციას აღწერს. ფილმის ჩვენება ვენეციის კინოფესტივალზე გაიმართა 6 სექტემბერს, პარალელურ პროგრამაში „საავტორო დღეები“ (Giornate degli Autori). მანამდე, 28 აგვისტოს ფესტივალზე ფილმის ჩვენება საავტორო უფლებებზე სასამართლო დავის გამო შეჩერდა. 4 სექტემბერს ცნობილი გახდა, რომ ვენეციის სასამართლომ რუსუდან გლურჯიძეს ფილმის ჩვენება ისევ დაუშვა და რეჟისორის "მორალური უფლებები" აღიარა. დეა კულუმბეგაშვილის ფილმი "აპრილი", რომელიც კინოცენტრის შესარჩევ კონკურსში დამარცხდა, ვენეციის კინოფესტივალის ჟიურის სპეციალური პრიზის მფლობელი გახდა. მთავარ კონკურსში ქართული ფილმები მხოლოდ გასული საუკუნის 90-იან წლებში მოხვდა - 1992 წელს ლანა ღოღობერიძის „ვალსი პეჩორაზე“ და 1996 წელს, ოთარ იოსელიანის „ყაჩაღები“. ...