აშშ-მა სანქციები დაუწესა რუსულ მედიაჯგუფ RT-ის (როსია სეგოდნია) აღმასრულებელ დირექტორს, ტელეწამყვან დმიტრი კისილიოვს და გაფართოვა სანქციები "მედიაჯგუფის" და ამავე სახელწოდების ტელეარხის მიმართ. აშშ-ის სახელმწიფო მდივანმა ენტონი ბლინკენმა არხს რუსული სამხედრო მანქანის ნაწილი უწოდა. ბლინკენის თქმით, არხის თანამშრომლები მონაწილეობას იღებენ რუსული სპეცსამსახურების ოპერაციებში. სახელმწიფო დეპარტამენტის წარმომადგენელმა ჯეიმს რუბინმა განაცხადა, რომ არხის ქმედებები აჩვენებს, რომ ის "არა მხოლოდ დეზინფორმაციის კერას წარმოადგენს, არამედ რუსეთის სადაზვერვო აპარატის სრულფასოვანი წევრია“. ენტონი ბლინკენის თანახმად, RT-ის სტრუქტურაში მინიმუმ 2023 წლიდან მოქმედებს კიბერგანყოფილება საინფორმაციო დივერსიისა და სამხედრო შესყიდვების ჩასატარებლად. მან მაგალითად მოიყვანა რუსეთში გამართული მრავალრიცხოვანი მედიაკამპანია, რომლებიც აგროვებენ თანხებს არმიის მხარდასაჭერად და უკრაინაში მეომარი სამხედრო ნაწილების აღჭურვილობის შესაძენად. აშშ-ის სახელმწიფო მდივანმა ასევე ახსენა მსოფლიოს სხვა ქვეყნებში არსებული პროექტები, რომლებიც „როსია სეგოდნიასთან“ არის დაკავშირებული. მათ შორის, კერძოდ, გერმანული ვიდეოპლატფორმა Red-ი და აფრიკული სოციალური ქსელი African Stream-ი, რომლებიც პრორუსული პროპაგანდის გასავრცელებლად გამოიყენება. სახელმწიფო მდივანმა ასევე განაცხადა, რომ რუსეთი მრავალი წლის განმავლობაში ცდილობს მოლდოვაში პოლიტიკაზე გავლენის მოხდენას პროპაგანდისტული მედიასაშუალებებით, მათ შორის, ოქტომბერში დაგეგმილ საპრეზიდენტო არჩევნებზე, აღვივებს მღელვარებასა და არეულობას. ...