უკრაინის პროტესტი გამოიწვია პოლონეთში უკრაინელი მოკრივის, მსოფლიოს ჩემპიონ (WBA, WBO, WBC, IBO ვერსიებით) ოლექსანდრ უსიკის დაკავებამ. უსიკი 17 სექტემბერს, საღამოს დააკავეს ქალაქ კრაკოვის აეროპორტში და მალევე გაათავისუფლეს. ოლექსანდრ უსიკმა, მიზეზის დაკონკრეტების გარეშე, მომხდარს უწოდა გაუგებრობა და მხარდაჭერისთვის მადლობა გადაუხადა უკრაინელ დიპლომატებს. მანამდე მოკრივის ცოლმა ეკატერინამ ინსტაგრამზე დაწერა, რომ „არაფერი კრიმინალური არ მომხდარა“. შუაღამის შემდეგ, 18 სექტემბერს უკრაინის პრეზიდენტ ვოლოდიმირ ზელენსკის ტელეგრამ-არხზე გამოქვეყნდა განცხადება, რომ აღშფოთებულია უკრაინის მოქალაქისა და ჩემპიონის მიმართ მსგავსი დამოკიდებულებით და საგარეო საქმეთა და შინაგან საქმეთა მინისტრებს დაავალა ინციდენტის ყველა დეტალის გარკვევა. ზელენსკი უსიკს ტელეფონით ესაუბრა. ასევე ნახეთ ოლექსანდრ უსიკმა ზელენსკის აჩუქა მსოფლიო ჩემპიონის ქამარი უკრაინის პრეზიდენტის განცხადებიდან დაახლოებით ერთ საათში, საგარეო საქმეთა მინისტრმა ანდრი სიბიჰამ სოციალურ ქსელ X-ში თავის ოფიციალურ გვერდზე დაწერა, რომ ოლექსანდრ უსიკის დაკავებას არაპროპორციულ ზომად და დაუშვებლად მიიჩნევენ და პოლონეთს შესაბამის ნოტას გაუგზავნიან. პოლონური ინტერნეტგამოცემების ცნობით, უსიკი კიევიდან ავტომანქანით ჩავიდა კრაკოვში, საიდანაც ესპანეთში უნდა გამგზავრებულიყო. ჯერჯერობით გაურკვეველი მიზეზის გამო, მოკრივის თანმხლები პირი რეისზე არ დაუშვეს, რასაც უსიკმა წინააღმდეგობა გაუწია და საბოლოოდ, ორივე მათგანი დააკავეს. ...