ოკუპირებული ცხინვალის რეგიონის ე.წ. საგარეო საქმეთა სამინისტრო ეხმაურება პარტია „ქართული ოცნების“ საპატიო თავმჯდომარის, ბიძინა ივანიშვილისა და საქართველოს პრემიერ-მინისტრის, ირაკლი კობახიძის განცხადებებს. ბიძინა ივანიშვილი ამბობს, რომ არჩევნების შემდეგ გამოძებნიან „საკუთარ თავში ძალას, რათა ბოდიში მოვიხადოთ იმის გამო, რომ დავალების შესაბამისად, მოღალატე „ნაციონალურმა მოძრაობამ“ 2008 წელს ცეცხლის ალში გახვია ჩვენი ოსი დები და ძმები". კობახიძემ კი განაცხადა, რომ „მკვლელებს და მწამებლებს ეროვნება არა აქვთ და მათთვის ბოდიშის მოხდას არც არავინ აპირებს, ქართველი გმირების მკვლელები და მწამებლები ზუსტად ისეთივე ოსები არიან, როგორი ქართველებიც არიან სააკაშვილი და მისი სისხლიანი რეჟიმის სხვა ლიდერები“. „უნდა აღინიშნოს, რომ ბატონი კობახიძის პოზიცია, რომელიც თავის თანამემამულეებს, რომლებიც სამხრეთ ოსეთის მშვიდობიანი მოსახლეობის წინააღმდეგ იბრძოდნენ, გმირებად თვლის, ოსებს კი, რომლებიც თავიანთ მიწას იცავდნენ, მკვლელებად, სავსებით შეესაბამება საქართველოში დამკვიდრებული რეალური მდგომარეობის დამახინჯებულ გაგებას“, - ნათქვამია დე ფაქტო საგარეო საქმეთა სამინისტროს განცხადებაში. ცხინვალში ამბობენ, რომ საქართველოში წინასაარჩევნო პერიოდში „ქართულ- ოსური ურთიერთობების თემას ასე თუ ისე გამოიყენებენ შიდაპოლიტიკურ წინასაარჩევნო ბრძოლაში“. „თუმცა ურთიერთობების დალაგების პერსპექტივა ვერ იქნება დამოკიდებული კონკრეტულ მომენტში საქართველოში შექმნილ პოლიტიკურ კონიუნქტურაზე. სამწუხაროდ, ოსი ხალხის ისტორიაში საქართველოს პოლიტიკისა და ქართველი პოლიტიკოსების მიერ დატოვებული ძალიან ბევრი სისხლიანი ლაქა და შეუხორცებელი იარაა“, - ნათქვამია განცხადებაში. დე ფაქტო ხელისუფლება თბილისს კეთილი განზრახვების დამადასტურებელი რეალური ნაბიჯების გადადგმისკენ მოუწოდებს - ძალის გამოუყენებლობის შესახებ ხელშეკრულების დადებით. ასევე ნახეთ კოკოითი: „საქართველომ უნდა ცნოს სამხრეთი ოსეთი და დაუბრუნოს ტერიტორიები" განცხადებაში ნათქვამია, რომ „სამხრეთ ოსეთის განვითარების პოლიტიკური ვექტორი არის ისტორიულად გაცნობიერებული არჩევანი, რომელიც განპირობებულია სამოკავშირეო და ინტეგრაციული კავშირების ყოვლისმომცველი გაძლიერების აუცილებლობით რუსეთის ფედერაციასთან, რომელიც არის რეგიონში მშვიდობისა და უსაფრთხოების გარანტი და რომლის ტერიტორიაზეც ცხოვრობს გაყოფილი ოსი ხალხის უმრავლესობა“. ასევე ნახეთ ივანიშვილის ბოდიში - რას ნიშნავს, ვისკენ მიემართება, რას ცვლის ეს ინიციატივა ...