საქართველოს პარლამენტის მიერ ლგბტ უფლებების შემზღუდავი კანონის მიღებას გერმანიის საგარეო საქმეთა სამინისტრო სოციალურ ქსელ X-ში გამოეხმაურა. უწყება მიიჩნევს, რომ კანონი საქართველოს კიდევ უფრო აშორებს ევროკავშირისგან. „საქართველოს პარლამენტის მიერ მიღებული საკანონმდებლო პაკეტი მიმართულია ლგბტქი პირების დისკრიმინაციისკენ. როგორც ვენეციის კომისიამ დაადგინა, იგი არღვევს ადამიანის ინდივიდუალურ სამოქალაქო უფლებებს. ის საქართველოს კიდევ უფრო აშორებს ევროკავშირისგან. ჩვენ მოვუწოდებთ საქართველოს, შეცვალოს თავისი კურსი“, - წერს გერმანიის საგარეო საქმეთა სამინისტრო. три საგარეო და უსაფრთხოების საკითხებში ევროკავშირის უმაღლესმა წარმომადგენელმა, ევროკომისიის ვიცე-პრეზიდენტმა ჟოზეპ ბორელმა საქართველოს ხელისუფლებას მოუწოდა ლგბტ უფლებებისა და გამოხატვის თავისუფლების შემზღუდავი კანონის გაწვევისკენ. „ქართული ოცნების“ ჰომოფობიური კანონპროექტების პაკეტი, რომელიც ლგბტ ადამიანების უფლებების შეზღუდვას ითვალისწინებს, საქართველოს პარლამენტმა 84 ხმით ნულის წინააღმდეგ მესამე, საბოლოო, მოსმენით გუშინ, 17 სექტემბერს, მიიღო. ასევე ნახეთ პარლამენტმა ლგბტ უფლებების შემზღუდავი კანონპროექტი მესამე, საბოლოო მოსმენით მიიღო პლენარული სხდომის პარალელურად, პარლამენტის შენობის უკან საპროტესტო აქცია გაიმართა. მოქალაქეები მიიჩნევენ, რომ პაკეტი არ პასუხობს ოჯახების გამოწვევებს. კანონპროექტის მესამე მოსმენით მიღებამდე განცხადება გაავრცელეს სამოქალაქო საზოგადოების ორგანიზაციებმა. მათ დაგმეს სიძულვილის, ჩაგვრისა და დისკრიმინაციის დაკანონების პროცესი პარლამენტში. ორგანიზაციების შეფასებით, კანონების პაკეტის მიზანი წინასაარჩევნოდ საზოგადოების მანიპულაცია, რეალური პრობლემების გადაფარვა, ირაციონალური შიშის გაღვივება და ქვეყნის ევროინტეგრაციის გზაზე კიდევ ერთი ბარიერის შექმნაა. კანონპროექტზე ვენეციის კომისიამ გამოაქვეყნა კრიტიკული რეკომენდაციები და პარლამენტს მოუწოდა, არ გაეგრძელებინა მასზე მუშაობა. კანონპროექტი უარყოფითად შეაფასა ევროკავშირის უმაღლესი წარმომადგენლის პრესსპიკერმა პეტერ სტანომ. „ეს პაკეტი ძირს უთხრის საქართველოს მოსახლეობის ფუნდამენტურ უფლებებს და მოსახლეობის ნაწილის სტიგმატიზაციისა და დისკრიმინაციის გაძლიერების საფრთხეს ქმნის“, - წერია 4 სექტემბერს გამოქვეყნებულ განცხადებაში. ევროპის საბჭოს ადამიანის უფლებათა კომისარმა მაიკლ ო’ფლაჰერტმა საქართველოს პარლამენტის თავმჯდომარეს გაუგზავნა წერილი, რომელშიც სთხოვა, საქართველოს პარლამენტს თავი შეეკავებინა ლგბტქ ადამიანების უფლებების შემზღუდველი კანონპროექტის დამტკიცებისგან. ...