დასრულდა ოპოზიციური პარტიების, „გახარია საქართველოსთვის“ და „ძლიერი საქართველო-ლელო, ხალხისთვის, თავისუფლებისთვის!“ ლიდერების, გიორგი გახარიასა და მამუკა ხაზარაძის მორიგი შეხვედრა. პრეზიდენტ სალომე ზურაბიშვილის მოწოდების შესაბამისად, მოლაპარაკების მთავარი თემა იყო საპარლამენტო არჩევნებზე ორი პარტიის ერთ საარჩევნო სუბიექტად გამოსვლა. როგორც შეხვედრის შემდეგ გახდა ცნობილი, ჯერჯერობით შეთანხმება ვერ შედგა. „მამუკას უნდა შეეთანხმებინა თავის გუნდთან. როგორც ჩანს, ვერ მოახერხა ჯერჯერობით. ვნახოთ, დაველოდებით“, - უთხრა ჟურნალისტებს შეხვედრის შემდეგ გიორგი გახარიამ და დააზუსტა, რომ უთანხმოება არ უკავშირდება პარტიულ სიაში ადგილების განაწილებას. მამუკა ხაზარაძის თანახმად, მან გიორგი გახარიას გაერთიანებაში თანაბარუფლებიან პარტნიორად შესვლა შესთავაზა. მან თქვა, რომ გახარიასთან კონსულტაციები გაგრძელდება. „წინააღმდეგი არავინ არ არის კოოპერაციაზე, ჩვენ ბატონ გიორგის შევთავაზეთ, რომ ამ გაერთიანებასა და კოალიციაში შემოსულიყო თანაბარ, სწორუფლებიან პარტნიორად... შესაბამისად, ჩვენ გავაგრძელებთ კონსულტაციებს, საუბარი გრძელდება, მინდა მას [გიორგი გახარიას] მადლობა გადავუხადო კონსტრუქციული მიდგომისთვის... რას მინდა რომ მივაღწიო, არჩევნებამდე ჩვენს მოქალაქეებს ვაჩვენოთ, როგორ გამოიყურება კოალიცია. ვის რა ზომა, წონა აქვს ამ კოალიციაში, ეს არ არის მთავარი. მთავარია, რომ ჩვენ ქართველ ხალხს ვაჩვენოთ, რომ მრგვალი მაგიდის, იდეის გარშემო, საქართველოს ინტერესებისთვის შესაძლებელია გაერთიანება. კონსულტაციები გაგრძელდება“, - აღნიშნა ხაზარაძემ. „ძლიერი საქართველოს“ ლიდერი ამბობს, რომ პრეზიდენტ ზურაბიშვილთან მუდმივი კომუნიკაცია აქვთ. ჯერჯერობით უცნობია, როდის გაიმართება გიორგი გახარიასა და მამუკა ხაზარაძის მორიგი შეხვედრა. პრეზიდენტმა სალომე ზურაბიშვილმა საპარლამენტო არჩევნების წინ ერთ საარჩევნო სუბიექტად გაერთიანებისკენ მოუწოდა გიორგი გახარიას და მამუკა ხაზარაძის პარტიებს. „გადაწყვეტილება ორი პროევროპული ძალის ("ძლიერი საქართველოს" და "გახარია საქართველოსთვის") ხელშია. ვიმედოვნებ, რომ ქვეყნის ესოდენ მნიშვნელოვან მომენტში შეძლებენ გადადგან ის ნაბიჯი, რომელიც ამომრჩეველს მეტ სიცხადეს, მეტ გარკვეულობას და მეტი ძალის განცდას მისცემს. ნაბიჯი, რომელიც ასევე დაარწმუნებს ამომრჩეველს, რომ შეუძლიათ პოლიტიკურ პარტიებს ქვეყნის გადარჩენის გულისთვის ბევრი რამ დათმონ და უმნიშვნელოვანესი როლი ითამაშონ ევროპული მომავლის გადარჩენაში, რასაც არავინ დაუვიწყებს მათ“, - თქვა პრეზიდენტმა 16 სექტემბერს. ხაზარაძისა და გახარიას პირველი შეხვედრა 17 სექტემბერს გაიმართა. ...