კურსკის ოლქში რუსეთის ჯარების კონტრიერიში შეჩერებულია, ოლქის ტერიტორიის ნაწილი უკრაინის კონტროლქვეშ რჩება, განუცხადა სააგენტო AFP-ს ამ ტერიტორიებზე შექმნილი უკრაინის შეიარაღებული ძალების კომენდატურის წარმომადგენელმა, ოლექსი დმიტრაშკოვსკიმ. რუსეთის ჯარები „ცდილობდნენ, ფლანგებიდან შეეტიათ, მაგრამ ისინი შეჩერებულ იქნენ, სიტუაცია სტაბილიზებულია და დღეს ყველაფერი ჩვენ კონტროლქვეშაა, მათ წარმატებას ვერ მიაღწიეს,“ მოჰყავს სააგენტოს დმიტრაშკოვსკის სიტყვები. ასევე, მისი სიტყვებით, უკრაინის ჯარების მიერ დაკავებულ ტერიტორიებზე რუსეთის რამდენიმე ათასი მოქალაქე რჩება. მან თქვა, რომ ზოგიერთ დასახლებულ პუნქტში კვლავაც 100-ზე მეტი ადამიანი ცხოვრობს. ომის პირობებში შეუძლებელია მეომარი მხარეების განცხადებების ოპერატიულად შემოწმება. ასევე ნახეთ ინტერაქტიური რუკა: უკრაინის ჯარების შესვლა კურსკის ოლქში როგორც BBC შენიშნავს, რუსეთის თავდაცვის სამინისტრომ სამშაბათს გამოაქვეყნა კურსკის ოლქში თავისი მოქმედებების ანგარიში, რომელშიც ნათქვამია, რომ რუსეთის არმია აგრძელებს შეტევით მოქმედებებს. თუმცა ანგარიშში არ იყო ლაპარაკი რაიმე დასახლებული პუნქტების „გათავისუფლებაზე“. საბრძოლო მოქმედებების შესახებ ინფორმაციაში ნახსენები იყო თითქმის იგივე ადგილები, რაც ერთი დღით ადრე. ...