რუსეთის პრეზიდენტმა ვლადიმირ პუტინმა დუმას რატიფიცირებისთვის გაუგზავნა ე.წ. სამხრეთ ოსეთის რესპუბლიკასთან გაფორმებული „ხელშეკრულება სამხედრო-ტექნიკური თანამშრომლობის განვითარების შესახებ". რუსეთის სახელმწიფო მედიის მიერ დღეს, 19 სექტემბერს, გავრცელებული ცნობებით, შესაბამისი დოკუმენტი დუმის მონაცემთა ბაზაში გამოქვეყნდა. მას თან ახლავს რუსეთის მთავრობის დასკვნა, რომ ამ „ხელშეკრულების რეალიზაცია ხელს შეუწყობს სამხედრო-ტექნიკურ სფეროში თანამშრომლობის გაღრმავებას რუსეთის ფედერაციის და სამხრეთ ოსეთის რესპუბლიკის თავდაცვისუნარიანობის განმტკიცების მიზნით“. რუსეთის და მის მიერ ე.წ. დამოუკიდებელ რესპუბლიკად გამოცხადებული „სამხრეთ ოსეთის“ მთავრობებმა ეს „ხელშეკრულება“ 2023 წლის 23 აგვისტოს ცხინვალში გააფორმეს. საქართველოს ამ ოკუპირებული რეგიონის დე ფაქტო პრეზიდენტმა ალან გაგლოევმა მაშინ განაცხადა, რომ თავს „რუსული სამყაროს ნაწილად“ გრძნობენ და ყოველთვის მიისწრაფოდნენ „რუსეთთან ერთად ყოფნისკენ“. ასევე ნახეთ “ეგ საკმარისი არ იქნება” - ოსები ივანიშვილის ბოდიშზე რუსეთის მიერ ოკუპირებულ ცხინვალის რეგიონში, რომლის ე.წ. დამოუკიდებლობა მოსკოვმა 2008 წლის აგვისტოში, საქართველოსთან ომის შემდეგ აღიარა, რუსეთის სახმელეთო ძალების მეოთხე ბაზაა განთავსებული. რუსეთს თავისი სამხედრო ბაზა აქვს საქართველოში ოკუპირებულ კიდევ ერთ, „დამოუკიდებელ რესპუბლიკად" გამოცხადებულ აფხაზეთში. ასევე ნახეთ მოსკოვმა სოხუმს „გამოსაფხიზლებელი წიხლი“ უთავაზა - როგორ შემოსწყრა კრემლი ოკუპირებულ აფხაზეთს? ...