17 და 18 სექტემბერს ლიბანში პეიჯერებისა და სხვა საკომუნიკაციო მოწყობილობების აფეთქებების შედეგად დაღუპულთა რიცხვი 32-მდე გაიზარდა. ამის შესახებ ტელეკომპანია "ალ-ჰურა“ ქვეყნის ჯანდაცვის სამინისტროზე დაყრდნობით იუწყება. 12 ადამიანი პეიჯერების აფეთქებების შედეგად 17 სექტემბერს დაიღუპა, ოცი პირი კი, მათ შორის რადიკალური დაჯგუფება ჰეზბოლას (აღიარებულია ტერორისტულად შეერთებულ შტატებში, ისრაელსა და რამდენიმე სხვა ქვეყანაში) ცხრა წევრი, სხვადასხვა პორტატიული საკომუნიკაციო საშუალების აფეთქებების შედეგად მეორე დღეს, 18 სექტემბერს, დაიღუპა. The New York Times-ის თანახმად, დაღუპულთა შორის ოთხი ბავშვია. ლიბანში ორ დღეში მომხდარი აფეთქებების შედეგად სამი ათასზე მეტი ადამიანი დაშავდა. ლიბანის მთავრობამ ისრაელი დაადანაშაულა მასობრივ თავდასხმაში. ისრაელმა ოფიციალურად არც დაადასტურა და არც უარყო თავისი როლი აფეთქებებში, მაგრამ NYT ისრაელის სამხედრო უწყებების თორმეტ წყაროზე დაყრდნობით წერს, რომ თავდასხმის უკან ისრაელელები დგანან. გაზეთის თანამოსაუბრეები ოპერაციას უწოდებენ რთულს და ჰყვებიან, თუ როგორ მომზადდა იგი. NYT-ის თანახმად, პეიჯერების წარმოებისთვის ისრაელმა დიდი ხანია შექმნა მინიმუმ სამი საერთაშორისო კომპანია, მათ შორის უნგრული B.A.C. Consulting-ი. ჩვეულებრივი მომხმარებლებისთვის კომპანია აწარმოებდა უსაფრთხო პეიჯერებს, მაგრამ ჰეზბოლასთვის მიწოდებული მოწყობილობები შეიცავდა ასაფეთქებლებიან ბატარეებს. ისრაელის დაზვერვის ოფიციალური პირები მათ უწოდებენ ღილაკებს, რომლებზე ხელის დაჭერა შესაფერის დროს უნდა მომხდარიყო. ასევე ნახეთ პეიჯერებით თავდასხმა - ესკალაციის ახალი ფაზა ჰეზბოლასა და ისრაელს შორის ჰეზბოლამ პეიჯერების შეძენა 2022 წლის ზაფხულში დაიწყო. მოგვიანებით შეკვეთების მოცულობა გაიზარდა, რადგან დაჯგუფების ლიდერმა "მობილური ტელეფონების დამარხვა" მოითხოვა იმის შიშით, რომ ისრაელს მათი გატეხა შეეძლო. თავისი წევრების მკვლელობისთვის ჰეზბოლა უკვე დაემუქრა ისრაელს შურისძიებით. ისრაელის სპეცსამსახურები არ გამორიცხავენ, რომ ჯგუფი ლიბანში მომხდარ თავდასხმაზე რეაგირებას რაც შეიძლება მალე მოახდენს. შესაბამისად, ისრაელმა გააძლიერა საბრძოლო მზადყოფნა. ...