უკრაინის უზენაესმა ანტიკორუფციულმა სასამართლომ საერთაშორისო ძებნილთა სიაში შეიყვანა „ვერხოვნა რადაში“ პროსაპრეზიდენტო პარტია „ხალხის მსახურის" დეპუტატი ანდრი ოდარჩენკო. 45 წლის პოლიტიკოსს ინფრასტრუქტურის აღდგენისა და განვითარების სახელმწიფო სააგენტოს ხელმძღვანელის, მუსტაფა ნაემის, მოსყიდვის მცდელობაში ადანაშაულებენ. ინფორმაციას ამის შესახებ რადიო თავისუფლების უკრაინული სამსახური ანტიკორუფციულ სასამართლოზე დაყრდნობით ავრცელებს. თავად დეპუტატი დანაშაულს უარყოფს. ოდარჩენკომ აღიარა, რომ კომუნიკაცია ჰქონდა რეკონსტრუქციის სახელმწიფო სააგენტოს ხელმძღვანელ მუსტაფა ნაემთან, მაგრამ, დეპუტატის თქმით, მისი თხოვნა იმით შემოიფარგლებოდა, რომ ნაემს მისთვის კრიპტოვალუტის გამოყენება ესწავლებინა. ოდარჩენკო გუშინ თავისი საქმის გარშემო დანიშნულ დაკითხვაზე არ გამოცხადდა. სპეციალიზებული ანტიკორუფციული პროკურატურის პროკურორმა განაცხადა, რომ სახალხო დეპუტატი შესაძლოა საზღვარგარეთ წასულიყო. დეპუტატის წინააღმდეგ სისხლის სამართლის საქმის აღძვრის შესახებ 2023 წლის ნოემბერში გახდა ცნობილი. გამომძიებლების თქმით, მას ქრთამის საფუძველზე სურდა მოეპოვებინა თანხები ხარკოვის სახელმწიფო ბიოტექნოლოგიური უნივერსიტეტის შენობების შეკეთებისთვის. „ხალხის მსახურის“ დეპუტატი ანდრი ოდარჩენკო ამ უნივერსიტეტის რექტორად 2021 წელს აირჩიეს. იგი ერთი წლის წინ დააპატიმრეს, მაგრამ გირაოს სანაცვლოდ გაათავისუფლეს. ასევე ნახეთ უკრაინაში არსებული კორუფცია კიევისთვის ამერიკის დახმარების მთავარი საფრთხეა - Politico ...